शिव महापुराण कथा ठरली शेवटची, 16 वर्षीय बालकाचा अपघातात मृत्यू

शिव महापुराण कथा ठरली शेवटची, 16 वर्षीय बालकाचा अपघातात मृत्यू

अकोला : जेसीबीनं दुचाकीला उडवल्यानं दुचाकीवर स्वार असलेला एका १६ वर्षीय मुलाचा मृत्यू तर त्याची आई जखमी झाली आहे. ही धक्कादायक घटना अकोला-पातूर रस्त्यावर ही घटना घडली असून जेसीबी चालकावर कारवाई करण्याची मागणी स्थानिक नागरिकांनी केली आहे. दरम्यान अकोला- पातूर महामार्गावरील म्हैसपुर इथं 'पंडित प्रदीप मिश्रा' यांच्या शिवमहापुराण कथा आटोपल्यानंतर घरी परतीच्या मार्गावर असताना वाटतेच त्यांचा अपघात झाला. यामध्ये ओमराज शिवहरी गावंडे (वय १६ रा. देऊळगाव, ता. पातूर, जि. अकोला) याचा जागीच मृत्यु तर त्याची आई जखमी झाली असून त्यांच्यावर उपचार सुरू आहे.

गावकऱ्यांकडून मिळालेल्या माहितीनुसार, अकोला जिल्ह्यातील अकोला- पातूर महामार्गावरील म्हैसपुर इथे 'पंडित प्रदीप मिश्रा' यांच्या शिवमहापुराण कथेला ५ मे पासून प्रारंभ झाला, आज ११ मे'पर्यत ही कथा चालणार आहे. दरम्यान पातुर तालुक्यातील देऊळगाव येथील ओमराज शिवहरी गावंडे (वय १६) आणि रुक्मिणीबाई शिवहरी गावंडे हे दोघेजण सकाळीच म्हैसपूर येथे प्रदीप मिश्रा यांच्या शिवमहापुराण कथा ऐकण्यासाठी गेले होते, कथा संपल्यानंतर दोघेही आई आणि मुलगा म्हैससूर येथेच थोडा वेळ मामाकड़ं थांबले, अन् काल सायंकाळच्या सुमारास देऊळगाव कडे म्हणजे घराकड़ रवाना झाले. दरम्यान अकोला पातूर रस्त्यावर असतांना समोरून आलेल्या जेसीबीनं त्यांच्या दुचाकीला जोरदार धडक दिली. त्या धडकेत दोघेही मायलेक गंभीर जखमी झाले होते. या अपघातात दुचाकीचा अक्षरक्ष: चुराडा झाला होता.

या घटनेची माहिती मिळताच पातूर पोलिस स्टेशनचे रमाकांत केकन, नागरीक दुलेखान युसुफ खान, निशांत गवई, प्रमोद कढोणे यांनी घटनास्थळ गाठले होते. या वेळी त्यांना युवक आणि महिला गंभीर अवस्थेत पडून दिसले. दोघांनाही रूग्णालयात दाखल केले असता डॉक्टरांनी ओमराज गावंडे याला मृत घोषित दाखविले. अकोला ते पातूर हा रस्ता चौपदरी झाला असून, देखील जेसीबी चालकाने विरूद्ध दिशेने निष्काळजीपणाने वाहन चालवल्याने समोरून येणाऱ्या दुचाकीस्वारास उडवून दिल्याने हा अपघात घडला अन् १६ वर्षीय मुलाचा मृत्यू झाला. या घटनेला जेसीबी चालक जबाबदार असल्याचा आरोप देऊळगाव येथील ग्रामस्थांनी केला असून, त्याच्यावर कारवाई करण्याची मागणी केली आहे.