दिव्यांगत्व प्रमाणपत्रासाठी विशेष तपासणी शिबिरांचे आयोजन करा जिल्हाधिकारी निमा अरोरा यांचे निर्देश

दिव्यांगत्व प्रमाणपत्रासाठी विशेष तपासणी शिबिरांचे आयोजन करा जिल्हाधिकारी निमा अरोरा यांचे निर्देश

अकोला- दिव्यांगाना त्यांचे दिव्यांगत्व प्रमाणपत्र तातडीने मिळावे यासाठी जिल्ह्यात विशेष तपासणी शिबिरांचे आयोजन करण्याचे निर्देश जिल्हाधिकारी निमा अरोरा यांनी दिले आहेत. या निर्देशानुसार, अकोला येथे शासकीय वैद्यकीय महाविद्यालयात सोमवार ते शनिवार, अकोट  येथे प्रत्येक बुधवार व गुरवार तर मुर्तिजापूर येथे  शुक्रवारी या विशेष शिबिरांचे आयोजन करण्यात येणार आहे. यासंदर्भात, जिल्हाधिकारी यांच्या दालनात दिव्यांग कल्याण कृती आराखडाबाबत आज बैठक पार पडली. यावेळी जिल्हा परिषदेचे मुख्य कार्यकारी अधिकारी सौरभ कटियार, निवासी उपजिल्हाधिकारी संजय खडसे, उपजिल्हाधिकारी बाबासाहेब गाढवे आदी उपस्थित होते.

दिव्यांगांना युडीआयडी व अस्थिव्यंग प्रमाणपत्र तातडीने मिळावे, याकरीता शिबिराचे आयोजन करण्यात आले आहे. जिल्हा व तालुकास्तरावरील सर्व दिव्यांगानी या शिबीराचा लाभ घ्यावा, असे आवाहन जिल्हाधिकारी निमा अरोरा यांनी केले.

या आढावा बैठकीत जिल्हाधिकारी निमा अरोरा यांनी निर्देश दिले की, जिल्ह्यातील दिव्यांगांना दिव्यांगत्व प्रमाणपत्र आधार कार्ड  व अस्थिव्यंग प्रमाणपत्र तातडीने उपलब्ध व्हावे, याकरीता अकोला येथे शासकीय वैद्यकीय महाविद्यालयात सोमवार ते शनिवार सकाळी १० ते दोन या वेळात सर्व प्रकारच्या दिव्यांगत्व तपासण्या होतील. तसेच ग्रामिण रुग्णालय अकोट येथे अकोट व तेल्हारा तालुक्यातील दिव्यांगांसाठी ग्रामिण रुग्णालय अकोट येथे प्रत्येक बुधवार व गुरुवारी सकाळी १० ते दोन यावेळेत फक्त अस्थिव्यंग तपासण्या होतील. तर मुर्तिजापूर उपजिल्हा रुग्णालय येथे शुक्रवारी सकाळी १० ते दोन यावेळात अस्थिव्यंग, नेत्र, मनोविकृती, बाल रोग उपचार, मेडिसिन (खुजेपणा, चेतासंस्था, थॅलेसेमिया, सिकलसेल इ.) तपासणी होईल. तरी त्या त्या तालुक्यातील दिव्यांगांनी या सुविधेचा लाभ घ्यावा. उर्वरित तालुक्यातील दिव्यांगांच्या तपासणीची सुविधा शासकीय वैद्यकीय महाविद्यालयात करण्यात आली आहे.

 दिव्यांग व्यक्तिंना दिव्यांगत्व प्रमाणपत्र मिळणे सुलभ व्हावे व ते एकाच ठिकाणी मिळावे, त्यासाठी त्यांना कष्ट कमीतकमी व्हावे. तसेच याच प्रमाणपत्रांच्या आधारे त्यांना विविध शासकीय योजनांचा लाभही मिळावा यासाठी या शिबिरांचे आयोजन करण्यात आले आहे.

शासनाच्या योजनेच्या लाभ देण्याकरीता युडीआयडी कार्ड व अस्थिव्यंग प्रमाणपत्र शिबीराच्या माध्यमातून प्राधान्याने उपलब्ध करुन द्या, असे निर्देश जिल्हाधिकारी अरोरा यांनी यावेळी यंत्रणांना दिले.

नागरी क्षेत्रातील दिव्यांगांना ॲपद्वारे नोंदणी करण्याचे आवाहन

 अकोला-  जिल्ह्यातील नागरी क्षेत्रातील दिव्यांगांचे सर्व्हेक्षण  सुरु असून दिव्यांगांनी मोबाईल ॲपद्वारे आपली  नोंदणी करावि असे आवाहन  जिल्हाधिकारी निमा अरोरा यांनी केले आहे.

दिव्यांगांसाठी राबविण्यात येणाऱ्या विविध कल्याणकारी योजनांचा लाभ दिव्यांगांपर्यंत पोहोचविण्यासाठी प्रशासनातर्फे माहिती संकलन सुरु आहे. त्यासाठी दिव्यांग सर्व्हे अकोला (Divyang Survey Akola) हे मोबाईल ॲप सुरु केले आहे. हे ॲप प्ले स्टोअरवरुन डाऊनलोड करुन दिव्यांग आपली माहिती आपल्या मोबाईलवर वा मोबाईल नसल्यास घरातील कुणाही व्यक्तिच्या मोबाईलवरुन भरुन आपली नोंदणी करु शकतात. तरी जिल्ह्यातील नागरी भागातील दिव्यांगांनी आपली नोंदणी करावी,असे आवाहन जिल्हाधिकारी श्रीमती अरोरा यांनी केले आहे.

अकोला डेली मेल मुख्य संपादक प्रा.पी.एस.थोरात मो.9822674487