घरगुती गॅस सिलिंडर महागला; आजपासून मोजावे लागणार इतके रुपये

इंधन दरवाढीने आधीच हैराण झालेल्या सर्वसामान्यांना आणखी एक झटका बसला आहे. पेट्रोलियम कंपन्यांनी घरगुती गॅस सिलिंडरच्या (LPG) दरांत पुन्हा एकदा वाढ केली आहे. विना सबसिडीवाल्या एलपीजी सिलिंडरच्या दरांत 25 रुपयांनी वाढ करण्यात आली आहे. घरगुती गॅस सिलिंडरच्या किंमती महागल्यामुळे सर्वसामान्यांच्या खिशाला चाप बसणार आहे.

घरगुती गॅस सिलिंडरच्या 14.2 किलोच्या LPG सिलिंडरचा दर राजधानी दिल्लीतील 859.5 रुपये झाला आहे. याआधी दिल्लीमध्ये या गॅस सिलिंडरची किंमत 834 रुपये इतकी होती. आर्थिक राजधानीमध्येही गॅस सिलिंडरच्या किंमतीत वाढ झाली आहे. गेल्या महिन्यात मुंबईत गॅसची किंमत 834.5 रुपये इतकी होती. आता यामध्ये 25 रुपयांनी वाढ झाली असून मुंबईत गॅस 859.5 रुपयांना मिळणार आहे. कोलकातामध्येही 14 किलोच्या घरगुती गॅसची किंमत 886 रुपये इतकी झाली आहे. याआधी कोलकातामध्ये गॅस सिलिंडर 861 रुपयांना मिळत होता. चेन्नईमध्ये 875.5 तर लखनऊमध्ये 897.5 रुपयांना 14 किलोचा गॅस मिळेल. याचबरोबर 19 किलोच्या कमर्शिअल सिलेंडरचे दर 68 रुपयांनी वाढले आहेत. दिल्लीत याचा दर 1618 रुपये झाला आहे.

मागील काही महिन्यांपासून सातत्याने घरगुती गॅस सिलेंडरच्या किंमतीमध्ये वाढ होत आहे. एक जानेवारी 2021 रोजी घरगुती गॅस सिलिंडरची किंमत 694 रुपये प्रति सिलिंडर होती. 1 मार्च 2021 पर्यंत ही किंमत 819 वर पोहचली होती. एप्रिल महिन्यात त्यात 10 रुपयांची कपात करण्यात आली होती. मे महिन्यात सिलिंडरचा भाव 810 रुपये झाला होता. तर जून महिन्यात कंपन्यांनी घरगुती सिलिंडरच्या दरात कोणताही बदल केला नाही

अकोला डेली मेल मुख्य संपादक प्रा.पी.एस.थोरात मो.9822674487

#akoladailymail

#akolanews

#citynews

#24news

#gas

#ujwala